27 июня

Канон на обретение мощей священномученика Владимира, митрополита Киевскаго

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 2:

Веры православныя непорочный блюстителю и заповедей Христовых усердный исполнителю, священномучениче Владимире, Христа всем сердцем возлюбив, паству твою добре упасл еси, незлобиво мученическую смерть приял еси. Сего ради в вечней славе пребывая, моли спастися душам нашим.

Канон глас 8.

Пе́снь 1.

Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припев: Священному́чениче Владимире, моли́ Бо́га о нас.

Правосла́вия побо́рника кре́пкаго, прииди́те, ве́рнии, восхва́лим ны́не пе́сньми и к моще́м цельбоно́сным его́ притека́юще те́пле, Изба́вителю все́х побе́дную пе́снь воспои́м.

Припев: Священному́чениче Владимире, моли́ Бо́га о нас.

Еди́наго Су́щаго на небесе́х па́че вся́каго стра́ха убоя́лся еси́, Тому́ Еди́ному вся́ким усе́рдием порабо́тал еси́, и кова́рствия вра́жия оплева́в, с Ни́м на ве́ки воцари́лся еси́.

Припев: Священному́чениче Владимире, моли́ Бо́га о нас.

Ра́дости присносу́щныя наде́ждою препоя́сався, терпе́нием в по́двиг страда́льческий вше́л еси́, те́мже не посрами́ Госпо́дь упова́ния твоего́, с ли́ки му́ченик сочета́ тя.

Сла́ва Отцу́ и Сы́ну и Свято́му Ду́ху:

Во́ин Христо́в непобеди́м показа́лся еси́, проти́ву безбо́жных тве́рдым испове́данием вооружи́вся, и раско́льником Це́ркве па́лицею слове́с святи́тельских противуста́в, венце́м неувяда́емым от Го́спода увя́злся еси́.

И ны́не и при́сно и во ве́ки веко́в. Ами́нь.

Богородичен: Отрокови́цу безму́жную, Ма́терь нетле́нную восхва́лим пе́сньми, ве́рнии, Тоя́ бо рождество́м с Бо́гом примири́хомся, и Тоя́ предста́тельством спасе́ния ча́ем.

Пе́снь 3.

Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Припев: Священному́чениче Владимире, моли́ Бо́га о нас.

Ми́лостию ко скорбя́щим украси́лся еси́, еще́ в нача́ле служе́ния твоего́, раздробля́юще а́лчущим хле́б тво́й, боля́щим же всеусе́рдно послужи́л еси́ сло́вом па́стырским, моли́твою и увеща́нием.

Припев: Священному́чениче Владимире, моли́ Бо́га о нас.

Устраши́ти не возмо́же тя́, о́тче Влади́мире, преле́стник стра́хом я́звы моровы́я, и запя́ти тя́ в служе́нии твое́м стра́ждущим, никого́же бо возгнуша́лся еси́ от ме́нших бра́тий твои́х.

Припев: Священному́чениче Владимире, моли́ Бо́га о нас.

Чу́вственною я́звою пораже́нным страда́ния облегчи́ти потща́лся еси́ пе́рвее, последи́ же проти́ву мы́сленныя я́звы безбо́жия и крамолы́ ста́л еси́ до́бре, во благове́рии соблюда́я ста́до твое́.

Сла́ва Отцу́ и Сы́ну и Свято́му Ду́ху:

Епи́скопства и́стиннаго о́браз бы́л еси́, страсте́й взыгра́ния пе́рвее обузда́в, на стра́же се́рдца твоего́ у́м епи́скопом поста́вил еси́, те́мже и о́вцы Христо́вы ко приста́нищу небу́рному му́дре упра́вил еси́.

И ны́не и при́сно и во ве́ки веко́в. Ами́нь.

Богородичен: Наде́ждо ненаде́емых, поги́бших обре́тение и заблужда́ющим обраще́ние — Ты́ еси́ Влады́чице Пречи́стая, ускори́ на по́мощь отча́явшимся рабо́м Твои́м.

Седа́лен, гла́с 4:

Истины Христо́вы дерзнове́нна свиде́теля, и ста́да слове́снаго па́стыря му́дра, предстоя́теля же престо́лу Госпо́дню неусы́пна, и во страда́льцех адама́нта недви́жима, воспои́м ны́не, ве́рнии, к моще́м его́ те́пле притека́юще, грехо́в оставле́ния и е́же от непра́вд на́ших свобожде́ния, сокруше́нным се́рдцем прося́ще.

Сла́ва, и ны́не, Богородичен:

Стра́нни и прише́льцы во оте́чествии свое́м бы́хом, и не и́мамы, где́ главу́ свою́ приклони́ти, чу́ждии сотвори́хомся единоплеме́нником свои́м, и ненави́стни пле́ншим на́с христобо́рцем; Ты́ же, Пречи́стая, бездо́мным еди́но прибе́жище, в по́мощь ускори́ земна́го гра́да зде́ не иму́щим, я́ко да гряду́щаго гра́да небе́снаго, взыска́в, обря́щем.

Пе́снь 4.

Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Припев: Священному́чениче Владимире, моли́ Бо́га о нас.

Иверския земли́ украше́ние пресла́вное яви́лся еси́, о́тче Влади́мире, служе́нием па́стырским подви́гся, све́том ева́нгельским разноплеме́нныя лю́ди просвеща́я, и суеве́рия мглу́ дале́че отгоня́я.

Припев: Священному́чениче Владимире, моли́ Бо́га о нас.

Ко гра́ду первопресто́льному возвраще́н промышле́нием Бо́жиим, просвети́тель отсту́пльших поставля́ешися. О чудесе́, о жа́лости исполне́ния! Ка́ко во Христа́ крести́вшияся ве́ка сего́ разу́мницы несмы́сленнее младе́нцев в ве́ре обрета́хуся!

Припев: Священному́чениче Владимире, моли́ Бо́га о нас.

Уче́нии твои́ми объюроде́вшия мирско́ю прему́дростию па́ки к Це́ркви Христо́вой приво́диши, млеко́м ева́нгельскаго словесе́ гла́дныя ду́ши пита́еши.

Сла́ва Отцу́ и Сы́ну и Свято́му Ду́ху:

Вои́стину ни еди́н же от ма́лых си́х забве́н бы́сть у тебе́, блаже́нне Влади́мире, ко все́м бо любы́ твоя́ распростре́ся, ни́щим, и простеце́м, и неве́ждом исто́чник неоскудева́ющий сло́ва Бо́жия отверза́еши.

И ны́не и при́сно и во ве́ки веко́в. Ами́нь.

Богородичен: Омраче́ние души́ моея́ просвети́, Всесве́тлая Влады́чице, да поне́ напосле́док житие́м до́брым после́дую Сы́на Твоего́ глаго́лом Боже́ственным, и́хже язы́ком пра́ведным веща́ти навыко́х.

Пе́снь 5

Ирмос: Утренююще, вопие́м Ти́: Го́споди, спаси́ ны, Ты́ бо еси Бо́г на́ш, ра́зве Тебе́, ино́го не ве́мы.

Припев: Священному́чениче Владимире, моли́ Бо́га о нас.

Иере́ом о́браз бы́л еси́, свя́те Влади́мире, житие́м, сло́вом и ве́рою, и́хже от преде́л земли́ Ру́сския собра́л еси́, с ни́миже вои́стину сла́ва и украше́ние Це́ркве Моско́вския бы́л еси́, с ни́ми же ку́пно и ны́не Го́споду предстои́ши.

Припев: Священному́чениче Владимире, моли́ Бо́га о нас.

Ангелом во смире́нии, апо́столом в ре́вности, му́чеником во испове́дании и́стины поревнова́л еси́, на пути́ ста́в малоду́шествующих и отсту́пников, к покая́нию те́х приводя́, обличе́нием кро́тким вразумля́я заблу́ждшия.

Сла́ва Отцу́ и Сы́ну и Свято́му Ду́ху:

Ре́вностию сла́вы Бо́жия снеда́емь, ко безу́мным глаго́лал еси́: я́ко кли́рицы вла́сти царя́ земна́го, Бо́гом благослове́ннаго, не чту́щии, ниже́ Небе́сному ве́рности сохрани́ти возмо́гут, сего́ ра́ди ко престо́лу церко́вному приступи́ти да не дерзну́т.

И ны́не и при́сно и во ве́ки веко́в. Ами́нь.

Богородичен: Сокро́вище чистоты́ и де́вства благоуха́ние — Ты́ еси́, Ма́ти Бо́жия Пречи́стая; отжени́ от на́с малоду́шия грехо́внаго злосмра́дие, и чистоту́ смы́сла пою́щим Тя́ да́руй.

Пе́снь 6.

Ирмос: Ри́зу мне́ пода́ждь све́тлу, одея́йся све́том, я́ко ри́зою, многоми́лостиве Христе́ Бо́же на́ш.

Припев: Священному́чениче Владимире, моли́ Бо́га о нас.

Ерети́чествующим и крамо́льником ве́рою кре́пкою, святи́телю, противуста́л еси́, па́ству твою́ от волко́в губи́тельных огради́ти тща́ся, гне́ва зло́бующих ника́коже убоя́лся еси́, ниже́ осужде́ния челове́ческа.

Припев: Священному́чениче Владимире, моли́ Бо́га о нас.

Храни́теля чистоты́ духо́вныя тя́ почита́ем, Влади́мире священному́чениче, ду́ху бо пре́лести лука́выя пред лице́м царе́вым противуста́л еси́, лицеприя́тие и человекоуго́дие всеконе́чно отве́рг, и́стины ра́ди Христо́вы.

Сла́ва Отцу́ и Сы́ну и Свято́му Ду́ху:

Пе́рвее гне́ва самоде́ржца не устраши́лся еси́, последи́ же беззако́ния дерзнове́нно обличи́л еси́, но о́в у́бо кро́тостию увеща́ние твое́ па́стырское послу́шаше, о́вии же, я́ко зве́ри ди́вии на тя́ устремля́хуся, те́мже све́тлость испове́дания твоего́ отобою́ду просия́.

И ны́не и при́сно и во ве́ки веко́в. Ами́нь.

Богородичен: Еди́на Чи́стая, еди́на Всепе́тая, еди́на во все́х роде́х Благослове́нная — Ты́ еси́, Госпоже́ Преми́лостивая, приклони́ благоутро́бием у́хо Твое́ ко воздыха́нием боле́зненным ра́б Твои́х.

Конда́к, гла́с 3:

В годи́ну гоне́ний лю́тых и́стинный Христо́в священноде́йствователь показа́лся еси́, пе́рвее ева́нгельское сло́во утвержда́я и Же́ртву безкро́вную Го́сподеви принося́, последи́ же с кро́вию твое́ю во святи́лище вше́дый, священному́чениче Влади́мире, моли́ Христа́ Бо́га, Це́ркви на́шей едине́ние пода́ти, и оте́честву от плене́ния христобо́рцев сохрани́тися, и душа́м на́шим спасе́ние улучи́ти.

Икос:

Дне́сь к честны́м твои́м моще́м притека́юще, первому́чениче в ру́сских иера́рсех, сокруше́нным се́рдцем взыва́ем к тебе́ с сострада́льцем твои́м Иоа́нном, пресви́тером и певце́м твои́м надгро́бным: согреши́хом па́че ниневи́тян дре́вних, покая́нию те́х не поревнова́вше, ты́ же со ины́ми испове́дники в же́ртву за гре́х се́й избра́н от Го́спода бы́л еси́. Во всесожже́ние Бо́жие не худоро́дное, но па́че дража́йшее и любе́знейшее Влады́це приноша́ти подоба́ет, я́ко да умиле́ние серде́чное и оставле́ние беззако́ний па́дшии восприи́мем, и от плене́ния христобо́рцев сохрани́мся, и душа́м спасе́ния улучи́ти сподо́бимся.

Пе́снь 7.

Ирмос: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Припев: Священному́чениче Владимире, моли́ Бо́га о нас.

Ру́сския Це́ркве едине́ния побо́рник тве́рдый яви́лся еси́, о́тче Влади́мире, безу́мствующия малоро́сския раско́льники вразумля́я, да не мня́т благи́х свои́х и свобо́ды своея́ обрести́ в бе́дствиях Це́ркве, разделе́нии терза́емыя.

Припев: Священному́чениче Владимире, моли́ Бо́га о нас.

Влади́мирове до́блести, ве́рнии, ка́ко не подиви́мся, ду́ху бо ве́ка сего́ не порабо́тився, и челове́ческим похоте́нием не послужи́в, искуше́ние де́монское тве́рдо отрази́л е́сть, ве́рность храня́ служе́нию святи́тельскому, е́же о едине́нии и благоустрое́нии церко́внем тща́тися.

Припев: Священному́чениче Владимире, моли́ Бо́га о нас.

Оста́виша тя́ бра́тия оби́тели Пече́рския, долготерпели́ве страда́льче, о коры́стех и вольнохожде́ниих в по́хотех свои́х печа́ся, волко́м лю́тым преда́ше па́стыря своего́, ты́ же кро́тостию и незло́бием все́х прости́л еси́.

Сла́ва Отцу́ и Сы́ну и Свято́му Ду́ху:

Еже от челове́к по́мощи не име́вый, тща́нием в моли́твах изря́дным ко святы́м южнору́сским прибе́гл еси́, и́хже предста́тельством небе́сным неразу́мным взыва́л еси́ от раско́ла преста́ти и по́хотей ра́ди свои́х Це́ркве Бо́жия не губи́ти.

И ны́не и при́сно и во ве́ки веко́в. Ами́нь.

Богородичен: Пред Тобо́ю, Цари́це Всеблага́я, припа́дающе, мо́лим Тя́: хода́тайствуй к Сы́ну Твоему́ со Влади́миром испове́дником но́вым, да преста́нут и в на́с раско́льник шата́ния, и самосвя́тов прельще́ния и собла́зны.

Пе́снь 8.

Ирмос: Царя́ Небе́снаго, Его́же пою́т во́и Ангельстии, хвали́те и превозноси́те во вся́ ве́ки.

Припев: Священному́чениче Владимире, моли́ Бо́га о нас.

Отче священному́чениче Влади́мире, кончи́ну и страда́ние свое́ предзря́, со умиле́нием неседа́льное пе́ние Пречи́стей Влады́чице приноси́л еси́, во Успе́нии Свое́м ми́ра не оста́вльшей, те́мже и на́с не оста́ви бе́дствующих грехми́, венце́м увя́зся от Го́спода нетле́нным во ве́ки.

Припев: Священному́чениче Владимире, моли́ Бо́га о нас.

Юнцы́ ту́чнии одержа́ша тя́, богоотсту́пники и обе́тов свяще́нных презри́телие, в нощи́ поя́ша тя́ и ведо́ша я́ко а́гнца на заколе́ние, ты́ же пе́ние надгро́бное пасха́льное Агнцу Бо́жию воспева́я, Того́ стопа́м ве́рно да́же до сме́рти после́довал еси́, с Ни́м же и воцари́лся еси́ во ве́ки.

Припев: Священному́чениче Владимире, моли́ Бо́га о нас.

Христо́во незло́бие ко уби́йцем твои́м простира́я, те́х благослови́л еси́ от лица́ Госпо́дня, оба́че словеси́ твоего́ добледу́шнаго не послу́шаша беззако́ннии, еди́ножды от ве́ры отре́кшися, неиспра́вни пребы́ша на ве́ки.

Сла́ва Отцу́ и Сы́ну и Свято́му Ду́ху:

Вои́стинну победи́тель де́монов и служи́телей и́х яви́лся еси́, Влади́мире сла́вне, е́же бо ко Христу́ тща́ния твоего́ запя́ти не возмого́ша, вся́ку же за́поведь Влады́чню испо́лнив ди́вным незло́бием и ве́рностию, страда́нием благоду́шным по́прище твое́ скончава́еши на земли́, к Невече́рнему Све́ту отхо́диши на ве́ки.

И ны́не и при́сно и во ве́ки веко́в. Ами́нь.

Богородичен: Агнца и Па́стыря на Кресте́ зря́ще пове́шена, с рыда́нием ми́лость Того́ прославля́еши и но́вых а́гнцев стада́ ми́лостию Твое́ю покры́вши, Тому́ после́довати дерза́ющих приво́диши, Агнице благослове́нная и Влады́чице, да с Ни́м воцаря́тся во ве́ки.

Песнь 9

Ирмос: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Припев: Священному́чениче Владимире, моли́ Бо́га о нас.

Ле́том испо́лншимся, па́ки к па́стве твое́й моща́ми возвраща́ешися, благослове́ние твоея́ десни́цы предсме́ртное и на́м подае́ши, я́ко да пути́ твоего́ после́дователие неотсту́пнии яви́мся.

Припев: Священному́чениче Владимире, моли́ Бо́га о нас.

Единовсе́льник преподо́бным Пече́рским не то́чию во сла́ве небе́сней яви́лся еси́, но и моща́ми цельбоно́сными с ни́ми положи́лся еси́, воскресе́ния гряду́щаго о́браз ве́рным показу́я, не преста́й у́бо, о́тче священнострада́льче Влади́мире, ку́пно с ни́ми о на́с ко Влады́це моли́тися.

Припев: Священному́чениче Владимире, моли́ Бо́га о нас.

Ни́зу прекло́ншимся, к земли́ прилепи́вшимся, страстьми́ жития́ погруже́нным, возведе́ние на́м к небеси́ подае́ши, а́ще то́кмо ру́це воздеже́м ко хвале́нию твоему́, о́бразом жития́ и страда́ния твоего́ умиля́яся.

Сла́ва Отцу́ и Сы́ну и Свято́му Ду́ху:

Истинныя сла́вы взыску́я, Влади́мире, тле́нную и земну́ю ни во что́ же вмени́л еси́, те́мже и на́м помози́ ру́це осла́бленнии на моли́тву возде́ти, и о́чи горе́ возвести́, да гряду́щаго во сла́ве Го́спода бо́дренным се́рдцем усря́щем, и сла́вы Его́ прича́стницы бу́дем.

И ны́не и при́сно и во ве́ки веко́в. Ами́нь.

Богородичен: Еди́на Наде́жда безнаде́жных, Влады́чице, ускори́ в по́мощь на́шу, сокруши́ ожесточе́ния серде́ц на́ших и помысло́в возноше́ние, се́ бо таковы́ми и толи́кими благоде́янии и чудесы́ я́же от Тебе́ и от моще́й но́вых уго́дников Бо́жиих доны́не снабдева́еми, в нечу́вствии па́ки пребыва́ем, бли́з гряду́щаго Суда́ Сы́на Твоего́ не бои́мся, и мно́жества грехо́в свои́х не трепе́щем, но моли́твами Твои́ми поне́ напосле́док умиле́ния сле́зы на́м да́руй.

Свети́лен:

Сло́вом Ева́нгельским челове́ки заблу́ждшия просвеща́я, того́ блиста́ние вну́трь прии́м, и страда́нием просвети́вся, ко Све́ту Невече́рнему прихо́диши, но и су́щим на земли́ просвеще́ние да́руй, о́тче священнострада́льче.

Сла́ва, и ны́не, Богородичен:

Ма́ти Све́та и Черто́г Царе́в — Ты́ еси́, Влады́чице, неможе́ние на́ше укрепи́, плене́ние возврати́, омраче́ние же просвети́, и мра́к уны́ния отжени́ от вопию́щих Ти́ похва́льная.

Молитва священномученнику Владимиру, митрополиту Киевскому

О священномучениче и исповедниче Христов Владимире! Услыши слезныя молитвы чад твоих и воздыхания, сердцем сокрушенным и смиренным приносимая. Се бо беззаконии омрачихомся и того ради бедами, яко тучами, обложихомся. Но ты, святе Владимире, понеси, яко сильный, немощи наша, не отлучайся от нас духом, да не разлучимся в конец от любве Божия. Призри милостивно на предстоящия и молящияся пред святою иконою твоею и вся прошения их во благое исполни. Веруем бо, яко твоих страданий ради за отечество и люди российския велие дерзновение ко Господу имаши. Егоже умоли, да укрепит ны в Православии и единомыслии, и непоколебимом даже до смерти исповедании веры Христовы, страну нашу да спасет от междоусобныя брани, пастырем нашим да подаст духовное трезвение и ревность о спасении пасомых, правителем же суд и правду, обидимым заступление, недугующим душ и телес исцеление. Мы же, грешнии, твоим предстательством укрепляеми, восхвалим Господа Иисуса Христа, Емуже слава подобает, честь и поклонение, со Безначальным Его Отцем и Пресвятым Духом, ныне и присно и во веки веков. Аминь.